कोकणातलो माणूस आंब्यासारखो गोड...!!

आंब्यातलो गोडवो माणसात दिसता 

की माणसाच्या मनातलो प्रेमळ जिव्हाळो आंब्यात असता...!!

ह्याच नक्की काय काळणा नाय, 

म्हणांच...!!

कोकणातलो माणूस आंब्यासारखो गोड...!!

कोकणातल्या आंब्याक साऱ्या जगात खय तोड नाय...!!

हापूस म्हणा की पायरी, रत्ना, केसर, म्हणा की सिंधु, मानकुर 

कोण गोड, कोण मधुर गोड, तर कोण रुचकर, आंबट गोड....!!

सगळ्याच आब्यांका गोडीचीच ओढ, म्हणांच...!!

कोकणातलो माणूस आंब्यासारखो गोड !!

कोंबो आरावल्यावर दिवस तेचो उजाडता 

डोळे चोळीतच पाटल्या दाराक जाता 

आपण खवच्या आधी गाई गुरांका चारो पाणी दिता..!!

पिता उकड्या तांदळाची पेज आणि खोबऱ्याची फोड 

कोकणातलो माणूस आंब्यासारखो गोड..!!

चार कुणगे नागरल्यानं तरी ढवळ्या, पवळ्याची काळजी घेता 

तेंच्या सोबत आपण पण स्वतः बैलासारखो राबता..!!

खाण्याकडे तेचे कसले मिजास नाय 

कुळदाची पिठी आणि उकडो भात, बुरखे मारून खाता 

वायच तोंडाक सुक्या बांगड्याची फोड

कोकणातलो माणूस आंब्यासारखो गोड..!!

आंब्या काजीच्या दिवसात सवड तेंका खय असता 

दिवसभर बागेतून, रानावणातून येचुन सगळा आणूचा असता 

रात्री सवडीन रतांबे फोडूक खळ्यात बसता

रतांबे फोडताना त्याच्या वांगडा गजालींची जोड..!!

कोकणातलो माणूस आंब्यासारखो गोड..!!

सुपारी आणि माडांच्या वाडीयेत मन तेचा बरा रमता 

नाल बोडो सोलून इकुक गोयाक धाडता...!! 

चुडतांन पासून वाडवणी करुक हात तेंचो बरो सरसरावता 

घरबसल्या मेळकतीची होता घरातल्या खर्चाक जोड...!!

कोकणातलो माणूस आंब्यासारखो गोड...!!

उकढ्या भातावर बांगड्याची कडी 

इर्डाचा तिकला, सुगटाची चटणी 

चमचमीत, झणझणीत तारल्याची कढी...!!

माश्याच्या जेवणची तेंका भारीच गोडी 

कधी ताकाची तर कधी सोलाची कडी, तेच्या जेवणाची तृप्ती करता

निवांत पानपट्टीत बनयत खाता सुपारीची फोड आणि...!!

कोकणातलो माणूस आंब्यासारखो गोड...!!

पोटापाण्यासाठी शहराकडे जाता नोकरी धंदो मोठ्या इमानन करता

गावाकडची शेतीवाडी संभाळुक रजा घेवन ओढाताण करता 

गावाकडे पैसो अडको पडल्या वेळाक धाडता...!! 

शहरात रावलो तरी मनात त्याच्या गावाकडची ओढ

कोकणातलो माणूस आंब्यासारखो गोड...!

चतुर्थी, शिमग्याक आवर्जून मोठ्या हौसेनं हजेरी लावता 

गावाच्या जत्रेची आणि दशावतारी नाटक बघूची भारी तेका हौस...!!

गावाक जाताना आवडीनं मिठाईचो पुडो प्रेमान हडता

सगळ्यांचा तोंड मायेन करता गोड

कोकणातलो माणूस आंब्यासारखो गोड...!!

पावण्यांची उटबस आवडीनं करता 

कोब्याचो रसो आणि घावणे करून वाढता

निरोप घेताना पावण्यांका भ्याट देऊन मायेन सांगता  

"येवा कधीव कोकण आपलाच आसा"...!! 

असा आवर्जून सांगता 

म्हणांनच काय ? 

आमकां सगळ्याका आसा कोकणची ओढ...!!

कोकणातलो माणूस आंब्यासारखो गोड...!!

लेखक : अर्जुन वालावलकर